முடிச்சு அவிழ்கின்றது...
இறைவன் எங்கென்று என் குருவிடம் - கேட்டேன்
இதயத்துள் புகுந்து பாரென்று - சொன்னான்
உலகத்தை இறைவன் படைத்ததேன் - என்றேன்
அறியும் பொருட்டு தனைதான் - என்றான்
ஆதம் ஏன் குற்றம் செய்தார் - என்றேன்
இறைவன் அருளுக்கது வழிகோல - என்றான்
சாத்தானை இறைவன் படைத்ததேன் - என்றேன்
சாரற்ற கனிகளைப் பிரித்திட - என்றான்
தலைவிதி என்பது என்னவென்று - கேட்டேன்
தலை கனத்தாடுவோர்க்கு எச்சரிக்கை - என்றான்
வாழ்க்கை என்பது என்னவென்று - கேட்டேன்
வாண வேடிக்கை சில நொடி - என்றான்
மரணம் என்பது என்னவென்று - கேட்டேன்
முரணான செயலுக்கு முடிவுரை - என்றான்
அறிவு என்பதை விளக்குங்கள் - என்றேன்
அறியாமல் இருப்பதே முழு அறிவு - என்றான்
தெளிவு என்பது எப்போது - என்றேன்
தன்னையே அறிந்தபின் வரும் அது - என்றான்
இருவிழி பார்வையோ ஒன்று ஏன் - என்றேன்
இருப்பது யாவுமே ஒன்றெனச் - சொன்னான்
சோதனை என்பது என்னவென்று - கேட்டேன்
வேதனை அடங்கிய இறை நெருக்கம் - என்றான்
தண்டனை என்பது என்னவென்று - கேட்டேன்
கண்டித்து செயல்களை வழிமாற்ற - என்றான்
நல்லோர்க்கே நோய்நொடி அதிகமேன் - என்றேன்
நாவினில் அவன் பெயர் நிலைத்திருக்க - என்றான்
சான்றோர்க்கு பொருட்செல்வம் ஏனில்லை - என்றேன்
சீரழிக்கும் கருவிகள் நமக்கேன் - என்றான்
"கலிமா"வின் உட்பொருள் என்னவென்று - கேட்டேன்
இல்லாமல் உணர்தல் இருப்பதை - என்றான்
மெளனத்தில் மூழ்குவது எவ்வாறு - என்றேன்
கண்ணுடன் எண்ணமும் மூடிவிடு - என்றான்
பாவங்களில் மட்டுமேன் வசீகரம் - என்றேன்
பார்வைகள் பகட்டினில் பதிவதால் - என்றான்
இறைஞானம் கிட்டுவதில் சிரமமேன் - என்றேன்
விரைவாய்க் கிடைப்பது விரயமாகும் - என்றான்
இறைகிருபை இருந்தும் அச்சமேன் - என்றேன்
உயிருடன் கலந்து உடலிருப்பதால் - என்றான்
சொர்க்கம் நமக்குக் கிடைக்குமா - என்றேன்
சொர்க்க அதிபதியைப் பிடிக்க முயல் - என்றான்
தொழுகையின் அர்த்தம் என்னவென்று - கேட்டேன்
வாழ்வதற்குப் பயிற்சி தரணியில் - என்றான்
"ஜகாத்" ஏன் தரவேண்டும் - என்றேன்
ஜகத்தில் வறுமை இல்லாமலாக்க - என்றான்
நொன்பின் மாண்பை விளக்குங்கள் - என்றேன்
நாயனை நெருங்கும் நல்லருள் - என்றான்
"ஹஜ்" ஜின் அவசியம் சொல்லுங்கள் - என்றேன்
அனைவரும் ஒன்றென உணர்த்த - என்றான்
"கிப்லா"வை நோக்கியே தொழுவதேன் - என்றேன்
சக்கரம் சுழல ஒர் அச்சாணி - என்றான்
இறுதிநாள் தீர்ப்பின் பொருளென்ன - என்றேன்
தேர்வின் முடிவைத் தெரிவித்தல் - என்றான்
ஒன்றுக்கு ஒன்றேன் முரண்பாடு - என்றேன்
ஒவ்வொன்றிலும் ஒன்று இருப்பதால் - என்றான்
அலைமோதும் மனதைப் பெற்றதேன் - என்றேன்
வலைவீசும் உலகை விலை பேச - என்றான்
புலனைக் கொண்டு நாம் அறிவதென்ன - என்றேன்
புலன் கடந்து ஒன்றிருப்பதை உணர்த்திட - என்றான்
- திருடியது
நன்றி
நிடுர் இன்போ
Posted by Wafiq
on Sunday, August 23, 2009.
Filed under